Hanggang Sa Muli, Ginoo

Iba't ibang klase ng tao ang ating matatagpuan at makikilala sa
buhay. Iba't ibang klase ng tao ang darating at dadaan upang sa atin
ay magpahayag ng interes, paghanga, at kung minsan naman, ng
pagmamahal. Ngunit hindi lahat ng nagpapahayag nito ay tunay at
nananatili. Sapagkat kadalasan, nagsisilbi lamang silang aral o kaya
naman ay inspirasyon sa atin. Sabi nga ng ilan, you never met a person
by accident. May dahilan at may dahilan daw kung bakit natin nakikilala
ang isang tao. May dahilan kung bakit ang iba sa kanila ay hindi nanatili
at nagtagal, may dahilan kung bakit dumaan lamang sila sa buhay
natin at agad ring lumisan. Ito nga pala ang isang maikling kwento
na may halong saya, kilig, at lungkot tungkol sa isang tao na naging
mahalagang bahagi ng aking buhay. Isang tao na naging bahagi ng
aking buhay sa loob lamang ng anim na araw. Kaya naman maituturing
ito na pansamantala ngunit nag-iwan naman ng permanenteng ala-ala
at inspirasyon na lagi kong taglay ngayon sa buhay.